Aao kuch der yunhi baithe kahin fursat se, to chalo kahin ghumlen dur talak khwaabon me kahin....

Fursat se baithe kahin chalo ek din, Aao ek shair Karen milon tak chal kar apne khwaabon me. Fir se yaadon ki saundhi mitti par let kar wo bite lamho waale khule aasman dekhen. Haath pasaare, kuch ghaas ko apni mutthi me bhar len, patte ki lakiron ko dekhen , bahti nadi se thoda paani nikal kar, ek bund ko alag kar dekhen, ek patthar jo feken pure jor se wo jaaye kahin nadi ke us paar. Mile fir wo kisi nayi mitti se naye patthar se. chalo ek nayi soch ke saath shair Karen. Kahin dur se aati jab chuk chuk ki aawaaj, tracktor ki kuda faandi se jo nikalte the sargam or saaj,  ek choti si lemchus (lemon juice) ko muh me dabaye, use bachaye rakhtey the jo lambi der tak, uski swaad jaisey hi ab ye zindagi hogayi hai.

Kuch cheezen or v hain saath me jo dil ke kisi kone me yunhi footpath pe pade hain, jo kabhi hatane ki koshish karta to unke ehsaan pe taras aajati hai, wo gali jisme cricket khelta tha, chot kha kar v sachin ko piche chodne ki hod hoti thi, bina matlab hi kisi dusre ko dekh, aagey jaane ki daud hoti thi. Wo Durdarshan ka rukaawat ke liye khed hai,or Ghumsuda ki talaash ya film ka shesh bhaag, wo tata tea ka kadak andaaz ya DD1 ka hum panch.

Vyomkesh bakshi ki jaasusi ya jab tarang dekhne waqt light chali jaati thi to chehre pe maayushi. Wo mahaan Samrat circus, or wo bhid thasa thas.

Kuch or jo the. wo Shot Gun (Shatrughan) ki khaamoshi (KHAMOSHHHHHHHHH………)

Ya R D BURMAN  ka VAKAAAUUUUUU……..

Aao kuch der yunhi baithe kahin fursat se to chalo kahin ghumlen dur talak khwaabon me kahin....

HAR GHAR KUCH KAHTA HAI......

                                                                                         

                                            Makaan

3 saal ho gaye, aisa ek din bhi nahi jab mai tumhe yad nahi karti, tumne puri duniyaa ghumi,

Europe dekha  france dekha, mujhe v khushi hui, jab tum tarakki karney lage bade banane lagey, par mai to wahin hun jahan tum chor kar gaye the, mai to tumse milne wahan nahi aasakti, kabhi man karey to tum to aa sakte ho, aisey v zindagi me vyast hone ka kya faayada jab apne hi chutate chaley jaayen, kitna accha lagta tha jab tum bacche the, meri god(aangan) me khela kartey the, jab v chotey kadmo se lambi lambi challang lagatey hue chaltey the or jab girtey the to apne papa se kah kar mujhe maar khilaatey the. Mere kaandhe pe chadh kar jo tum patang udaatey the. Jab v bhaiya tumhara khilauna le leta tha, (mere gale)ek kone me jaa kar chipak jaatey the koi kitna v hatata nhi hatate the. Tum to sab bhul gaye. mai, mai to bhul hi nahi pati, tumhe chotey se bade hotey dekha hai. Tumhaari shaadi v dekhi maine, kitne khush the tum or jab mere aangan me khelne ke liye ek or nanha munaa aata us se pahley hi yahan hospital acchey nahi hai ka bahana kar ke tum chaley gaye,  ab to bas mai wahin akeli khadi hun, umra v ho chali hai ab to bas khadhar hi hun, jab apne log apne aangan me rahtey hain to himmat badi hoti hai, ab jab koi nahi to ye akelapan mujhe maar rahi hai,

Tum badal gaye ho lekin aaj v ye galiyan waisey hi hain, or jo  saamne naali behti thi, ab bhi behti hai, use banaane ke liye municipal waaley aaye the, aadhe adhure bana kar chaley gaye, ab logon ko or pareshaani hoti hai, bagal me wo jo aslam rahta hai, ab wo bada ho gaya hai, or apni bakari ko mere hi bagiya me baandh jaata hai,  apne kamre me diya baati karne waala v ab koi nahi hai, aisa lagta hai bhut ro raha hai, samne pole pe tangi bulb se jo halki raushani aati thi tuti khidki se, ab wo bhi nahi aati kyun ke pichli baarish me bulb fut gayi thi, tum they to lagatey the, ab kisko padi hai, kahtey hain jiski makaan saamne hai wo jaane. Bagal waaley bargad ki jo ped hai ab or ghani or badi ho gayi hai, uski daaliyan mere maathe par jhuli rahti hai. Saarey tulsi ke ped to kab ke sukh gaye hain, or saara paint to kab ka kharaab ho gaya, tum jab v aao tumhara swagat hai, mai intejaar karungi.

Waisey suna hai, tumne delhi me 3bhk ki flat li hai, kya wahan meri tarah badi si aanagan hai, 10, 12 kamrey to honge na, tumhe koi pareshaani to nahi hoti jab bua ya chacha aatey hain, aangan me dhup aati hai? Billiyan mundero par aati hai kya? Ek baat puchun kya tumhe maine dhang se nahi rakha jo tumne itney mahangey daamon me sirf 3 room ki ghar liye. Bina angan bina chhatt. Chalo Jaisa bhi hai accha hai, bas kabhi kabhi yaad kar liya karna.

Tumhari  Gaayatri Kunj

Nayi sadak, Jeevanpur

100082.

ACTION KA SCHOOL DAYS

11:55 ho gaye hain ab bilkul bhi padhaai me man nahi lag raha kyun ki 12:00 baje chutti ho jaayegi, hum sab sahme nigaahon me chutti ki khushi bharkar, home work note kar rahe hain, master ji ne kaha, kal sab ko 11 ka pahaara (table), yad kar ke aana hai. hume unki aawaj pe kam or ghadi ki tic tic ki aawaaj pe jyada dhyan thi. Golu se mai rubber maang kar apne baste me daalne hi waala tha ki tabhi, tan tan, tan tan tan. ki aawaj class room me gunj uthi, or lage daudne 

gate ki taraf, koi bhi kahin se bhi dhakka lagata, master ji ko hatata hua aagey aa kar dost mandli ki intejaar karne lage. tabhi baarish bhi shuru ho gayi. ab jitne bacche nikle the wo nikal gaye or baaki sab fans gaye school me.

kyun ke aaj friday tha to aaj ka dress white tha. ab baarish me hum sab nikal gaye or bhigte bhigaatey sadkon par masti kartey, kabhi daayen kabhi baayen, to kabhi action ki school shoes ki less ko bandhte hue gadhhe me chalaang lagatey hue jaa rahey the. waisey bhi baarish ka asli majaa to bhigne me hi hai, wo bhi school dress me taaki dusre din agar kapde or shoes sukhe na hue to school na jaana pade. log agal bagal baarish ke karan chupe hue the or hume dekh kar wo bhi khush ho rahey the, humsab me se koi naach raha tha koi gaane gata chal raha tha, sadkon pe jami paani to ye ehsaas dila rahi thi jaise us chotey samandar ke hum baadshhah hain. pata nahi kya kya chizen paairon me aa kar lipatati thi, par sochne ka waqt kise tha. kaagaj ki naaw bana kar race lagaane lagey, dekhte hain kiski naaw pehle dubati hai. fir v man nahi bhara to jutey hi bahaa diye...ab baarish halki hoti gayi saath me hamaari masti bhi.. bhigey gandey kapdey me ghar pahunche to wahan bhi dhunaai or pitaai ki baarish ho gayi, or jab agley din bina homework ke school gaya to wahan bhi baarish.

aaj jab baarish me fasta hun, to mai bhi kinaarey me chup jata hun, or jab fir se aisey bacchon ko masti karte dekhta hun to mai bhi hans padta hun, ab bas farq itna sa tha, ke pehle mai wahan tha aaj yahan hun.

ab jab baarish se mulakat hogi to agli baar jarur bhigunga, or fir se paani me chap chap karenge.

aaj jab puraane bakshe me kuch dhundh raha tha tab meri najar wo puraane school shirt par gayi to kuch baatein yad aagayi, or us jutey ko aaj v saaf kar ke rakhta hun. ACTION KA SCHOOL DAYS.